[ភ្នំពេញ] – ខណៈដែលពិភពលោកកំពុងតាមដានយ៉ាងយកចិត្តទុកដាក់ចំពោះការកើនឡើងកម្តៅរវាង សហរដ្ឋអាមេរិក និងអ៊ីរ៉ង់ កម្ពុជាដែលជាប្រទេសនាំចូលប្រេងឥន្ធនៈ ១០០% បាននឹងកំពុងរងឥទ្ធិពល ផ្ទាល់ពីការប្រែប្រួល តម្លៃថាមពលសកលនេះ។
១. តម្លៃប្រេងនៅកម្ពុជា៖ សន្ទុះកើនឡើងគួរឱ្យកត់សម្គាល់
យោងតាមសេចក្តីជូនដំណឹងថ្មីបំផុតរបស់ ក្រសួងពាណិជ្ជកម្ម ចុះថ្ងៃទី១០ ខែមីនា ឆ្នាំ២០២៦ (សម្រាប់អនុវត្តពីថ្ងៃទី១១ ដល់ថ្ងៃទី១៣ ខែមីនា) តម្លៃប្រេងលក់រាយនៅក្នុងប្រទេសកម្ពុជាបាន ហក់ឡើងដល់កម្រិតមួយគួរឱ្យព្រួយបារម្ភ៖ ប្រភេទប្រេងឥន្ធនៈ សាំងធម្មតា កើនទ្បើងដល់ទៅ ៥,២០០ រៀល និង ប្រេងម៉ាស៊ូត កើនទ្បើងដល់ទៅ ៦,០៥០ រៀល។
ចំណុចសម្គាល់៖ តម្លៃប្រេងម៉ាស៊ូតបានហក់ឡើងខ្ពស់ជាងសាំងធម្មតាយ៉ាងខ្លាំង ដែលនេះគឺជា សញ្ញាអាសន្នសម្រាប់វិស័យដឹកជញ្ជូន និងផលិតកម្ម ដោយសារម៉ាស៊ីនធុនធំ និងឡានដឹកទំនិញ ភាគច្រើនប្រើប្រាស់ប្រេងម៉ាស៊ូត។
២. ផលប៉ះពាល់ខ្សែសង្វាក់ផលិតកម្ម និងតម្លៃទំនិញ
ការកើនឡើងនៃតម្លៃប្រេងឥន្ធនៈ មិនមែនប៉ះពាល់តែអ្នកចាក់សាំងឡាន-ម៉ូតូប៉ុណ្ណោះទេ ប៉ុន្តែវាប៉ះពាល់ ដល់សេដ្ឋកិច្ចទាំងមូល៖
ថ្លៃដឹកជញ្ជូន៖ នៅពេលប្រេងម៉ាស៊ូតឡើងដល់ ៦,០៥០ រៀល ថ្លៃដឹកជញ្ជូនទំនិញពីបណ្តាខេត្តមក កាន់ទីក្រុង និងការនាំចេញទៅក្រៅប្រទេសនឹងកើនឡើង ដែលបង្ខំឱ្យអាជីវករត្រូវដំឡើងថ្លៃទំនិញ សព្វសារពើនៅលើទីផ្សារ។
អតិផរណាម្ហូបអាហារ៖ ប្រជាពលរដ្ឋដែលមានចំណូលទាបនឹងរងគ្រោះខ្លាំងជាងគេ ដោយសារចំណាយ លើម្ហូបអាហារ និងការធ្វើដំណើរប្រចាំថ្ងៃកើនឡើង ស្របពេលដែលប្រាក់ចំណូលនៅទ្រឹង ឬក៍អាចថយចុះ។
វិស័យកសិកម្ម៖ កសិករដែលប្រើប្រាស់ម៉ាស៊ីនបូមទឹក និងត្រាក់ទ័រនឹងត្រូវចំណាយដើមទុនផលិត ខ្ពស់ជាងមុន ដែលអាចធ្វើឱ្យប្រាក់ចំណេញរបស់ពួកគេធ្លាក់ចុះ។
៣. ហានិភ័យនៃវិបត្តិសេដ្ឋកិច្ចសកលមកលើកម្ពុជា
ដូចដែលអ្នកសេដ្ឋកិច្ចអាមេរិកបានព្រមានអំពី «វិបត្តិសេដ្ឋកិច្ច» ប្រសិនបើសហរដ្ឋអាមេរិក និងអឺរ៉ុបធ្លាក់ ក្នុងវិបត្តិមែននោះ កម្ពុជានឹងរងគ្រោះពីរជាន់៖
ការធ្លាក់ចុះការបញ្ជាទិញ៖ ប្រសិនបើអ្នកប្រើប្រាស់នៅអាមេរិកកាត់បន្ថយការចំណាយ វិស័យកាត់ដេរដែលជាឆ្អឹងខ្នងសេដ្ឋកិច្ចកម្ពុជានឹងរងផលប៉ះពាល់ ដែលការបញ្ជាទិញសម្លៀកបំពាក់ និងស្បែកជើងនឹងអាចធ្លាក់ចុះ។
វិស័យទេសចរណ៍៖ ការកើនឡើងថ្លៃសំបុត្រយន្តហោះ (ដោយសារថ្លៃប្រេងយន្តហោះឡើង) នឹងធ្វើឱ្យចំនួនភ្ញៀវទេសចរអន្តរជាតិមកកាន់កម្ពុជាមានការថយចុះ។
ទោះបីជារាជរដ្ឋាភិបាលកម្ពុជាបានខិតខំជួយសម្រួលតម្លៃ ដោយបញ្ចុះតម្លៃលក់រាយចំនួន ៦,៥ សេនដុល្លារ/លីត្រ ដើម្បីជួយសម្រាលជីវភាពពលរដ្ឋក៏ដោយ ប៉ុន្តែប្រសិនបើសង្គ្រាមមជ្ឈិមបូព៌ា នៅតែបន្តឆាបឆេះ ហើយតម្លៃប្រេងសកលហក់ឡើងលើស $១២០ ក្នុងមួយបារ៉ែល នោះសម្ពាធ សេដ្ឋកិច្ចលើកម្ពុជានឹងកាន់តែធ្ងន់ធ្ងរដែលមិនអាចចៀសរួច។
