ប្រទាលកន្ទុយក្រពើ(Aloe Vera) ត្រូវបានគេស្គាល់និងប្រើប្រាស់ជាយូរយារណាស់មកហើយដោយសារតែវាមានអត្ថប្រយោជន៍ជាច្រើនចំពោះសុខភាពនិងសម្រស់។ វាត្រូវបានគេចាត់ទុកថាមានដើមកំណើតដំបូងឡើយនៅតំបន់ភាគអាគ្នេយ៍នៃឧបទ្វីបអារ៉ាប់ជាពិសេសនៅភ្នំហាចារ (Hajar Mountains)ភាគឦសានប្រទេសអូម៉ង់ (Oman)និងភាគខាងកើតប្រទេសអារ៉ាប់រួម (U.A.E)។ទោះបីជាដើមកំណើតពិតប្រាកដរបស់វាគឺនៅតំបន់អារ៉ាប់ក៏ដោយ ក៏ប្រទាលកន្ទុយក្រពើត្រូវបានគេដាំដុះនិងប្រើប្រាស់ជាឱសថនិងសម្រាប់ថែរក្សាសម្រស់ជាយូរលង់ណាស់មកហើយ៖
• កំណត់ត្រាបុរាណបំផុតនៃការប្រើប្រាស់ប្រទាលកន្ទុយក្រពើមានតាំងពីប្រមាណ៤,២០០ឆ្នាំ មុន២២០០ឆ្នាំមុនគ្រិស្តសករាជ នៅក្នុងអរិយធម៌មេសូប៉ូតាមៀ (Mesopotamia) និងអេហ្ស៊ីប (Egypt)។ជនជាតិអេហ្ស៊ីបបុរាណថែមទាំងបានហៅវាថារុក្ខជាតិអមតៈ ទៀតផង។
• ដោយសារតែវាស្ថិតនៅក្បែរផ្លូវពាណិជ្ជកម្មបុរាណរវាងអាស៊ីនិងមេឌីទែរ៉ាណេដើមប្រទាលកន្ទុយក្រពើបានរីករាលដាលទៅកាន់តំបន់ផ្សេងៗទៀតដូចជាអាហ្វ្រិកខាងជើង អាងមេឌីទែរ៉ាណេ ឥណ្ឌា និងក្រោយមកទៅដល់កោះឥណ្ឌូខាងលិច (West Indies) និងទូទាំងពិភពលោកក្នុងអាកាសធាតុក្តៅស្ងួតនិងពាក់កណ្តាលត្រូពិច។
*គ្នាយើងដឹងហើយថាប្រទាលកន្ទុយក្រពើមានប្រសិទ្ធភាពក្នុងការព្យាបាលបាន។ប្រទាលកន្ទុយក្រពើមានជាតិទឹក៩៩%ហើយភាគច្រើនយើងតែងឮថាប្រទាលកន្ទុយក្រពើអាចព្យាបាលការរលាកស្បែកដោយកម្ដៅថ្ងៃបានប៉ុន្តែតាមពិតទៅប្រទាលកន្ទុយក្រពើមានប្រយោជន៍ច្រើនជាងនេះទៅទៀត។
ប្រទាលកន្ទុយក្រពើមានប្រសិទ្ធភាពក្នុងការព្យាបាលទៅលើការខូចខាតស្បែកច្រើនប្រភេទដូចជាការមុតនឹងរបស់អ្វីមួយជាដើម។ប្រទាលកន្ទុយក្រពើអាចបង្កើនការលូតលាស់កោសិកាស្បែកថ្មីនិងពន្លឿនការផលិតកោសិកាឡើងវិញដែរ។យើងអាចយកមកប្រទាលកន្ទុយក្រពើមកបិទលើមុខរបួសបាន។
ប្រទាលកន្ទុយក្រពើត្រូវបានប្រើសម្រាប់ព្យាបាលការរលាកតិចតួចតាំងយូរណាស់មកហើយព្រោះវាមានប្រសិទ្ធភាពបញ្ចុះកម្ដៅកាត់បន្ថយការរលាកនិងផលិតកោសិកាស្បែកឡើងវិញ។យើងអាចកោសយកជែលមកលាបលើកន្លែងរលាកតែម្ដងក៏បាន។
ពេលសត្វល្អិតទិចឬខាំអាចនឹងរមាស់ព្រោះទឹកមាត់សត្វល្អិតមានផ្ទុកជាតិពុលនិងសារធាតុបង្កអាលែកហ្សីដែលអាចបណ្ដាលឲ្យរមាស់ហើមឬរលាកក្នុងកម្រិតផ្សេងៗ។ ប្រទាលកន្ទុយក្រពើមានប្រសិទ្ធភាពធ្វើឲ្យត្រជាក់បំបាត់ការឈឺចាប់រមាស់និងការរលាកបាន។យើងអាចប្រើជែលប្រទាលកន្ទុយក្រពើទៅលើកន្លែងរលាកដោយផ្ទាល់។
យើងអាចធ្វើប្រដាប់ខាត់ស្បែកជាមួយប្រទាលកន្ទុយក្រពើបាន។ប្រដាប់ខាត់នេះអាចជួយឲ្យស្បែកស្អាតនិងជួយកម្ចាត់កោសិកាស្បែកងាប់។ម៉្យាងទៀតគ្នាយើងដែលមានស្បែកមុខងាយប្រតិកម្មអាចប្រើវិធីនេះបាន។របៀបធ្វើប្រដាប់ខាត់ជាមួយនឹងប្រទាលកន្ទុយក្រពើដោយលាយជែលប្រទាលកន្ទុយក្រពើ២ស្លាបព្រាកាហ្វេស្ករត្នោត២ស្លាបព្រាកាហ្វេនិងទឹកក្រូចឆ្មារ ១ស្លាបព្រាកាហ្វេរួចយកមកលាបលើស្បែកនិងលាងសម្អាតចេញ។
ប្រទាលកន្ទុយក្រពើអាចជួសជុលកោសិកាស្បែកនិងអាចប្រឆាំងនឹងផ្សិតឬបាក់តេរីបាន។ទាំងអស់នេះអាចបង្ការ និងព្យាបាលបញ្ហាមុននិងបញ្ហាស្បែក rosacea (សរសៃឈាមលើផ្ទៃរីកធំធ្វើឲ្យស្បែកមុខឡើងក្រហម )ក្រៅពីនេះប្រទាលកន្ទុយក្រពើក៏មានប្រសិទ្ធភាពក្នុងការព្យាបាលស្នាមជាំស្នាមមុននិងការខូចខាតស្បែកដែរ។យើងអាចយកជែលប្រទាលកន្ទុយក្រពើមកលាបលើកន្លែងមានបញ្ហាស្បែកទាំងនេះ។
អត្ថបទ៖ ជួន សុធា
