កម្ពុជាគ្រោងនឹងបើកដំណើរការជាផ្លូវការនូវសមិទ្ធផលថ្មីរបស់ខ្លួននោះគឺជា ព្រលានយន្តហោះអន្តរជាតិមរតកតេជោ គ្រោងនឹងបើកដំណើរការបណ្តោះអាសន្ននៅថ្ងៃទី៩ ខែកញ្ញា ឆ្នាំ២០២៥ ខាងមុខនេះហើយ ។ជាមួយគ្នានេះដែររដ្ឋលេខាធិការដ្ឋានអាកាសចរណ៍ស៊ីវិលបានកំណត់យកថ្ងៃចន្ទ ទី២០ ខែតុលា ឆ្នាំ២០២៥ សម្រាប់រៀបចំពិធីសម្ពោធបើកឱ្យប្រើប្រាស់អាកាសយានដ្ឋានអន្តរជាតិតេជោ លំដាប់ថ្នាក់ 4F ជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
គម្រោងវិនិយោគលើអាកាសយានដ្ឋានអន្តរជាតិតេជោ បានបើកការដ្ឋានសាងសង់កាលពីថ្ងៃទី៧ ខែមករា ឆ្នាំ២០២០ ដោយមានទុនវិនិយោគប្រមាណ ១៥០០លានដុល្លារជាគម្រោងចម្រុះរដ្ឋ និងឯកជន ដោយក្រុមហ៊ុនឯកជន OCIC មានភាគហ៊ុន ៩០% និងរដ្ឋលេខាធិការដ្ឋានអាកាសចរណ៍ស៊ីវិល (SSCA) ១០%។
គូសបញ្ជាក់ដែរថាប្រលានយន្តហោះនេះសាងសង់ឡើងលើផ្ទៃដីជាង ២ ៦០០ហិចតា ស្ថិតនៅស្រុកកណ្ដាលស្ទឹង ខេត្តកណ្តាល ដែលមានចម្ងាយប្រមាណ ២០គីឡូម៉ែត្រភាគខាងត្បូងនៃរាជធានីភ្នំពេញ ដែល អាចអនុញ្ញាតឱ្យយន្តហោះខ្នាតធំចុះចតបាន ក្នុងនោះមានយន្តហោះប្រភេទ Airbus A380 និង Boeing 747747-800 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ សម្រាប់ដំណាក់កាលទី១ ពីឆ្នាំ២០២០ដល់២០៣០ ដំណាក់កាលទី២ ឆ្នាំ២០៣០ ដល់ឆ្នាំ២០៥០ ទទួលភ្ញៀវបាន ៣០លាននាក់ និងដំណាក់កាលទី៣ ចាប់ពីឆ្នាំ២០៥០ អាចទទួលភ្ញៀវបាន ៤៥លាននាក់។
ចំពោះយន្តហោះ Airbus A380 ត្រូវបានផលិតឡើងដោយបំពាក់ម៉ាស៊ីនចំនួន៤ និងមានទម្ងន់អតិបរមា ៥៦០តោន ដោយអាចហោះបានចម្ងាយ ១៥០០០គីឡូម៉ែត្រ ដែលមានសមត្ថភាពសម្រួលដល់ការធ្វើដំណើរតាមផ្លូវអាកាស ព្រោះវាអាចឱ្យក្រុមហ៊ុនអាកាសចរណ៍ ដឹកជញ្ជូនអ្នកដំណើរបានច្រើន នៅពេលមានតម្រូវការខ្ពស់ ព្រមទាំងបានកាត់បន្ថយចំនួនជើងហោះហើរ។
ចំណែកយន្តហោះ Boeing 747-800 គឺជាស៊េរីចុងក្រោយបំផុតមួយនៃពួកយន្តហោះដែលមានទំហំធំ និងតួខ្លួនវែង ស្ថិតនៅក្នុងត្រកូល Boeing 747 ដែលផលិតដោយក្រុមហ៊ុនយន្តហោះពាណិជ្ជកម្មខ្នាតយក្សអាមេរិក Boeing។វាមានប្រវែងទទឹង ១៨ ហ្វីត (ឬស្មើ ៥,៥ ម៉ែត្រ) និងមានប្រវែងបណ្តោយសរុប ២៥០ ហ្វីត (ឬស្មើ ៧៦ ម៉ែត្រ) ដែលធ្វើឲ្យវាក្លាយជាយន្តហោះដែលមានតួខ្លួនវែងបំផុតមិនធ្លាប់មានរបស់ Boeing។Boeing 747-8 អាចមានសមត្ថភាពផ្ទុកអ្នកដំណើរសរុបចំនួន ៤៦៧ នាក់ ឬផ្ទុកទំនិញរហូតដល់ ១៤០ តោន ជាមួយការហោះហើរបានឆ្ងាយបំផុតដល់ ៤ ១២០ ម៉ាយ ឬស្មើទៅនឹង ៧ ៦៣០ គីឡូម៉ែត្រ។
ព្រលានយន្តហោះអន្តរជាតិមរតកតេជោនឹងក្លាយជាអាកាសយានដ្ឋានធំជាងគេទីប្រាំបួននៅក្នុងពិភពលោក និងត្រូវបានកំណត់ថាជាព្រលានយន្តហោះលំដាប់ 4F ៕
អត្ថបទដោយ៖ កណ្ណិការ
